მოთუშული ბოსტნეული

მოთუშული ბოსტნეული- ძალიან სასარგებლო და ჯანსაღი ვეგეტარიანული კერძი. ხოლო მათთვის, ვისაც ხორცი უყვას- არაჩვეულებრივი გარნირი. ასევე, ძალიან კარგი კომბინაციაა ბრინჯთან ან ჩინურ ლაფშასთან.

დაგვჭირდება: 2 ბულგარული წიწაკა (ნებისმიერი ფერის) 2 სტაფილო 1 მოზრდილი თავი ხახვი 200-250 გრ სოკო 200-250 გრ ბროკოლი 200-250 გრა ბრიუსელის კომბოსტო 200-250 გრამი ნედლი მწვანე ლობიო (მე გაყინულს ვყიდულობ) დაახლოებით 4 ს.კ. სოიოს სოუსი 2 ს.კ. ზეითუნის ზეთი მარილი, ფერადი წიწაკა

გახურებულ ტაფაზე (იდეალურია თუ მოამზადებთ ტაფა-ვოკში) ვასხავთ ზეთს და ვყრით მსხვილად დაჭრილ ხახვს, ხახვი გამჭვირვალე რომ გახდება ვუმატებთ დაჭრილ ბულგარულს, შემდეგ სტაფილოს, ბრიუსელის კომბოსტოს, სოკოს, ბროკოლის და ნედლ ლობიოს. ვამატებთ სოიოს სოუსს, მარილს, წიწაკას და დაახლოებით 5 წუთი ვთუშავთ თავდახურულს. ყველაფერს ვამზადებთ საშუალოზე მაღალ ცეცხლზე, მხოლოდ ბოლოს, როცა ვახურავთ თავსახურს, ცეცხლს დავუწევთ. შეგიძლიათ დაუმატოთ ან გამოაკლოთ ბოსტნეული თქვენი გემოვნებით, ასევე შეანელოთ ნივრით, სეზამის მარცვლებით და ა.შ.