გუფთები

ტეფტელი, ფრიკადელი, გუფთა- როგორც გნებავთ ისე დაარქვით. ჩემი შვილები მათ მითბოლემს უწოდებენ და ძალიან უყვართ, განსაკუთრებით კარტოფილის გარნირთან ერთად. თუ მეხსიერება არ მღალატობს, კარლსონის ერთ-ერთი უსაყვარლესი კერძიც ეს იყო. გთავაზობთ ჩვენებურ ვერსიას.

დაგვჭირდება: 1 კგ ხორცის ფარში (მე საქონლის ხორცის ფარშით ვამზადებ, მაგრამ შეგიძლიათ შერეული ფარშიც გამოიყენოთ) 1-2 თავი ხახვი 2-3 კბილი ნიორი ნახევარი ჭიქა ბრინჯი 1 კვერცხი მარილი საფანელი 2 ს.კ. ზეთი 50 გრ კარაქი

პირველ რიგში, უნდა მოვამზადოთ ბრინჯი. გავრეცხოთ, დავასხათ წყალი და ვადუღოთ სულ 5 წუთი. კარგად არ უნდა მოიხარშოს. შემდეგ გადავწუროთ და გავავლოთ ცივი წყალი. ხორცის ფარშს შევურიოთ გატარებული ხახვი, ნიორი, დავუმატოთ ბრინჯი, მარილი, კვერცხი და კარგად მოვურიოთ. გამოვძერწოთ პატარა ბურთები, ამოვავლოთ საფანელში. გახურებულ ტაფას მოვასხათ ზეთი და დავდოთ კარაქი. დავყაროთ ტაფაზე ჩვენი მითბოლები და შევბრაწოთ ყველა მხრიდან საშუალოზე ოდნავ დაბალ ცეცხლზე. ძალიან უხდება ნებისმიერი გარნირი- ბოსტნეული, ბრინჯი, კარტოფილი, პასტა. ასევე, უხდება არაჟანი ან პამიდვრის საწებელი.