სანგრია

შაბათს საღამოს მივცეთ თავს ცოტა განტვირთვის უფლება. ყველაზე საზაფხულო, ყველაზე არომატული და გრილი სასმელი- სანგრია მოვამზადოთ.

სანგრიას უამრავი ვარიაცია არსებობს. კლასიკურად მასში ატამი, ვაშლი და ციტრუსები უნდა ყოფილიყო. ასევე ცოტაოდენი ბრენდი და, რა თქმა უნდა, ღვინო. თავდაპირველად სანგრიას მხოლოდ წითელი ღვინისგან ამზადებდენ, მაგრამ არანალებ გემრიელია თეთრი და ვარდისფერი ღვინის სანგრიაც. ასევე, ხილის არჩევანიც შესაძლოა ნებისმიერი იყოს, სეზონის და თქვენი გემოვნების შესაბამისად.

ცხელ ზაფხულს, ვფიქრობ, მსუბუქი, თეთრი ღვინის სასმელი უფრო მოუხდება. ჰოდა დღეს სწორედ ასეთ სანგრიას მოვამზადებთ ჩვენც და დავუმატებთ არომატულ სეზონურ ზაფხულის ხილს.

დაგვჭიდება:

1 ლ მსუბუქი თეთრი ღვინო

500 მლ შუშხუნა ღვინო

2 ატამი

2 ვაშლი

100 გრ კენკრა (ჩვენ შემთხვევაში ჟოლო)

ნახევარი პატარა, არომატული ნესვი

2 ფორთოხალი

1 ლიმონი ან ლაიმი

50-100 მლ შაქრის სიროპი (თუ ღვინო მშრალია, მეტი, თუ ტკბილი-ნაკლები. სიტკბო გააკონტროლეთ თქვენი გემოვნებით) ასევე, სიროპის ნაცვლად შეგიძლიათ გამოიყენოთ გრენადინი

ყინული

ერთ მოზრდილ დოქში ჩავასხათ ღინო და შუშხუნა ღვინო, შმდეგ დავუმატოთ დაჭრილი ხილი. გემოვნებით დავატკბოთ შაქრის სიროპით ან გრენადინით. კარგად მოვურიოთ.

სულ ესაა, ჩვენი სანგრია მზადაა.

მირთმევის წინ ჩაამატეთ ყინული, კოკტეილი უნდა იყოს ძალიან ცივი.

გემრიელად მიირთვთ და დატკბით უქმე დღეებით!