ქათმის რულეტი ისპანახით და სულგუნით

დღეს ჩვენ იტალიურ კერძს ქართულად მოვამზადებთ და ქათამს პესტოს და მოცარელას შიგთავსის ნაცვლად ისპანახით და სულგუნით გავაკეთებთ.

დაგვჭირდება:

2 მთელი ნაჭერი ქათმის მკერდი, ან 4 ნახევარი (კანისა და ძვლების გარეშე)

150 გ ისპანახი

1 კბილი ნიორი

4 საშუალო ნაჭერი სულგუნი

ზეითუნის ზეთი

მარილი, წიწაკა

მოვამზადოთ 4 თანაბარი ნაჭერი ქათმის ფილე და დავბეგვოთ ისე, რომ გაბრტყელდეს დაახლოებით 0,5 სმ სისქემდე. მოვაყაროთ მარილი და წიწაკა.

ზეთში ოდნავ მოვთუშოთ გაჭყლეტილი ნიორი და დავუმატოთ დაჭრილი ისპანახი. მოვთუშოთ დარბილებამდე. დავუმატოთ ოდნავ მარილი და წიწაკა.

ქათმის ნაჭრებს დავადოთ ისპანახი, შემდეგ თითო ნაჭერი ყველი და გადავახვიოთ რულეტივით. დავამაგროთ ხის ჩხირებით.

ტაფას ან საცხობ ფორმას მოვუსვათ ცოტა ზეთი, დავალაგოდ ჩვენი რულეტები. რულეტებს ზევიდანაც გადავუსვათ ოდნავ ზეთი, კარგად რომ დაიბრაწონ და შევდოთ 180 გრადუსამდე გახურებულ ღუმელში დაახლოებით 45 წუთით.

გემრიელად მიირთვით!