Vepřo-knedlo-zelo- ღორის ხორცი კნედლიკებთან და მჟავე კმბოსტოსთან ერთად

ამ კერძის სახელწოდება რომ ვთარგმნოთ, გამოგვივა- ღორი-კნედლიკი-მჟავე კომბოსტო. ეს სამი იდეალურად შეხამებული კომპონენტი ჩეხური სამზარეულოს ერთ-ერთი მთავარ კერძს შეადგენს. დღეს ჩვენც ვცადოთ მისი გამეორება.

დაგვჭირდება:

1 კგ რბილი ღორის ხორცი

3-4 კბილი ნიორი

2-3 დაფნის ფოთოლი

5-7 მუხუდო სურნელოვანი წიწაკა

1ლ შავი ლუდი

წითელი წიწაკა

შავი წიწაკა

მარილი

მჟავე კომბოსტოსთვის:

1 კგ მჟავე კომბოსტო

300 გ ხახვი

1 ს.კ. ძირა

1 ჩ.კ. ტკბილი პაპრიკა

სურვილისამებრ- ცხარე წიწაკა

1 ს.კ. შაქარი

1 ს.კ. კარაქი

3-4 ფირფიტა ბეკონი

სოუსისთვის:

2 ს.კ.წითელი მოცხარის სოუსი (შეგიძლიათ მურაბაც გამოიყენოთ)

1 ს.კ. ფქვილი

ხორცის კარგად წავუსვათ დაჭყლეტილი ნიორი, მარილი და წიწაკები, დავუმატოთ დაფნის ფოთოლი, სურნელოვანი წიწაკა, გადავახვიოთ პლასტიკში და დავტოვოთ ასე მთელი ღამით მაცივარში.

მეორე დღეს შევწვათ ეს ხორცი კარგად გახურებულ სქელძირიან ტაფაზე ყველა მხრიდან, შემდეგ ჩავდოთ ცეცხლგამძლე ჭურჭელში, მოვასხათ ლუდი და შევდოთ 180 გრადუსამდე გახურებულ ღუმელში დაახლოებით 2 საათით.

სანამ ხორცი ცხვება, მოვამზადოთ კომბოსტო: ბეკონი დავჭრათ წვრილად და მოვხრაკოთ კარაქში, შემდეგ დავუმატოთ თხლად დაჭრილი ხახვი, ძირა, პაპრიკა, წიწაკა და მჟავე კომბოსტო. მოვთუშოთ რამდენიმე წუთი და მზადაა.

გამომცხვარი ხორცი გადავდოთ დაფაზე, მისი წვენი კი გავატაროთ საცერში და დავუმატოთ მოცხარის მურაბა, 1 ს.კ. ფქვილი და ცოტა წყალი. წამოვადუღოთ და ვხარშოთ რამდენიმე წუთი, სოსუსის კონსისტენციამდე.

დავჭრათ ხორცი, მივუწყოთ მჟავე კომბოსტოს გარნირი, კნედლიკები (მათი მომზადება ჩვენ უკვე ვისწავლეთ) და მოვასხათ სოუსი.

გემრიელად მიირთვით!