თაფლში და წითელ ღვინოში დამარინადებული გამომცხვარი იხვი

ამ არაჩვეულებრივ კერძს ჩეხები სადღესასწაულოდ ამზადებენ. მიუხედავად იმისა, რომ შობას და ზამთრის სეზონს იდეალურად მოუხდება, ვფიქრობ დღესაც არ იტყვიან ჩემი მეგობრები მის დაგემოვნებაზე უარს.

დაგვჭირდება:

1 კარგი იხვი ან ბატი

0,5 ჩ.კ. ძირა

300 მლ მშრალი წითელი ღვინო

200 მლ წყალი

100 გ თაფლი

მარილი

კომბოსტოს გარნირისთვის:

1 საშუალო თავი კომბოსტო

100 გ ხახვი

200 გ ვაშლი

50 გ შავი ქლიავის ჩირი

50 მლ ღვინის ძმარი

100 გ შაქარი

50 გ ბეკონი

მარილი

იხვი კარგად გავრეცხოთ და ჩავდოთ მარინადში. მოვაყაროთ მარილი, ძირა, მოვასხათ თაფლი, შევაზილოთღ ეს ყველაფრი ჩავდთ ღრმა ჭურჭელში და მოვასხათ წითელი ღვინო, წყალი და შევდოთ მაცივარში მთელი ღამით.

მეორე დღეს, გადავწუროთ მარინადი, გავამშრალოთ იხვი და შევდოთ 200 გრადუსამდე გახურებულ ღუმელში ერთი 15-20 წუთით, შემდეგ კი დავუწიოთ ტემპერატურას 165 გრადუსამდე, გადავაფაროთ ფოლგა და ვაცხოთ ჩვენი იხვი კიდე 2 საათი. პერიოდულად მოვასხათ ღვინო და წყალი. ბოლო 10 წუთის განმავლობაში ფოლგა მოვაცალოთ და ისე მოვბრაწოთ.

ბეკონში მოვთუშოთ თხლად დაჭრილი ხახვი, დავუმატოთ ასევე თხლად დაჭრილი კომბოსტო, შაქარი და ვთუშოთ, სანამ არ მოხდება კარამელიზაცია. დავუმატოთ დაჭრილი შავი ქლიავის ჩირი, წყალი, ძმარი, დავაფაროთ თავსახური და ვთუშოთ კიდე 20 წუთი. ბოლოდ დავუმატოთ წვრილად დაჭრილი ან გახეხილი ვაშლი, მარილი და კიდე რამდენიმე წუთი ვთუშოთ.

მოვამზადოთ კარტოფილი კნედლიკები ისე როგორც ვისწავლეთ, მხოლოდ ცომს დავუმატოთ 2-3 კბილი დაჭყლეტილი ნიორი.

ერთი ბოთლი კარგი წითელი ღვინოც მოვიმარაგოთ და მივუსხდეთ სუფრას.

გემრიელად მიირთვით!