ალუბლის პავლოვა მასკარპონეს კრემით

დღეს ძალიან გემრიელი ალუბლის სოუსი მოვამზადეთ, და ამიტომ გადავწყვიტე, რომ დესერტზეც ალუბლის თემა გავაგრძელო და უგემრიელესი პავლოვა მოვამზადო. ისეთივე ჰაეროვანი, მსუბუქი და არაჩვეულებრივი, როგორც ეს შესანიშნავი ბალერინა იყო.

ბეზესთვის დაგვჭირდება:

6 კვერცხის ცილა

250 გრ შაქრის პუდრა

1 ჩ.კ. სახამებელი

1 ჩ.კ. ლიმნის წვენი

ვანილი

კრემისთვის დაგვჭირდება:

500 გ მასკარპონე

250 მლ მაღალცხიმიანი ნაღები

150 გ შაქრის პუდრა

ვანილი

2 ს.კ. ალუბლის ლიქიორი (რომი, კონიაკი, ამარეტო)

500 გრ. ალუბალი

კვერცხის ცილა ავთქვიფოთ მაგრად ლიმნის წვენთან ერთად, დავუმატოთ ნელ-ნელა შაქარი.

ცალკე კარგად ავურიოთ ერთმანეთს ვანილი და სახამებელი და დავუმატოთ ცილას. ვთქვიფოთ მანამ, სანამ არ მივიღებთ მკვრივ ბეზეს მასას.

საცხობ ფორმას დავაფინოთ საცხობი ქაღალდი, მოვხაზოთ სასურველი ზომის წრე (დაახლოებით 26 სმ.) და კოვზით დავდოთ ამ წრეზე ბეზეს მასის ნახევარი.

გამოვაცხოთ დაახლოებით 2,5 საათი 100 გრადუსამდე გახურებულ ღუმელში 2 ერთნაირი ფირფიტა. გამოცხობის შემდეგ, დავტოვოთ ღუმელში გაციებამდე.

მასკარპონეს დავუმატოთ შაქრის პუდრა, ვანილი და რომი. კარგად ავთქვიფოთ გაციებული ნაღები და შევურიოთ მასკარპონეს მასას.

გაგრილებული ბეზეს ფენა დავფაროთ კრემის ნახევარით და ზევიდან მოვაყაროთ კურკასაცლილი ალუბლები (ნაწილი შევინახოთ მოსართავად). შემდეგ დავაფაროთ ბეზეს მეორე ფენა, ისევ კრემი და ზევიდან მოვრთოთ დარჩენილი ალუბლით.

გემრიელად მიირთვით!