ჩიზქეიქი რომით და ბანანით

დღეს მოვამზადებთ ჩიზქეიქის კიდე ერთ ძალიან გემრიელ ვარიანტს- რომში კარამელიზებული ბანანით.

ძირისთვის დაგვჭირდება:

250 გ ფხვირი ორცხობილა

100 გ კარაქი

შიგთავსისთვის დაგვჭირდება:

700 გ კრემჩიზი

100-150 გ შაქარი

200 მლ 33% ნაღები

50 მლ რომი

3 კვერცხი

ვანილი

2 ს.კ. სახამებელი

ბანანის ქუდისთვის დაგვჭირდება:

2 მოზრდილი ბანანი

3 ს.კ. ყავისფერი შაქარი

50 მლ რომი

ვანილი

20 გ კარაქი

შეგვიძლია მოვამზადოთ ერთი დიდი (26-28 სმ დიამეტრის) ჩიზქეიქი, ან რამდენიმე პატარა, პორციული ნამცხვარი.

ორცხობილა კარგად დავაბლენდეროთ, დავუმატოთ დამდნარი კარაქი. ჩავდოთ ეს მასა საცხობ ფორმაში და კარგად დავტკეპნოთ.

შევდოთ ჩვენი ძირი 160 გრადუსამდე გახურებულ ღუმელში 10 -15 წუთით.

სანამ ძირი გრილდება, მოვამზადოთ შიგთავსი: კარგად ავთვიფოთ კრემჩიზი და შაქარი, დავუმატოთ თითო-თითო კვერცხი. კარგად მოვურიოთ, შემდეგ დავუმატოთ ნაღები და ისევ მოვურიოთ, შემდეგ რომი, სახამებელი, ვანილი. უნდა მივიღოთ ერთგვაროვანი ჰაეროვანი მასა. ეს მასა დავასხათ ჩვენ ძირს და ფორმა შევდოთ 160 გრადუსამდე გახურებულ ღუმელში დაახლოებით 1 -1,5 საათით.

გამომცხვარი ჩიზქეიქი გავაგრილოთ ღუმელშივე და შევდოთ მაცივარში მინიმუმ 4 საათით.

ამის შემდეგ, ვამზადებთ ბანანს. დავჭრათ თანაბარ ლამაზ ნაჭრებად. ტაფაზე დავყაროთ შაქარი, დავუმატოთ ვანილი 1 ს.კ. წყალი და შევთბოთ. შაქარი რომ გადნება, დავუმატოთ კარაქი,კარგად მოვურიოთ და ჩავალაგოთ ბანანი. მოვთუშოთ ბანანი ორივე მხრიდან სულ 1-2 წუთი, თორე ჩაიშლება და მოვასხათ რომი. მოვახდინოთ ფლამბირება და შემდეგ გამოვრთოთ ქურა.

ბანანი რომ გაგრილდება, ლამაზად მოვათავსოთ ჩვენ ჩიზქეიქზე, მოვასხათ ცოტაოდენი კარამელი და ისევ შევდოთ მაცივარში.

გემრიელად მიირთვით!