კომშის მარინადი

ამ არაჩვეულებრივი მარინადის რეცეპტი ჩემმა გურმე - მეგობარმა მასწავლა. მასთან გავსინჯე ასეთი ხერხით დამარინადებული ქლიავი, ალუბალი და შინდი. საოცრად გემრიელი იყო ყველა, განსაკუთრებით ქლიავი.

როგორც აღმოჩნდა, ამ ხერხით სხვა ხილის და ბოსტნეულის დამარინადებაც შესაძლებელია. ერთ - ერთი ჩემი ფავორიტი- კომშის მარინადია, რომელსაც დღეს მოვამზადებთ. მაგრამ თქვენ შეგიძლიათ ზუსტად იგივე მეთოდით პრაქტიკულად ნებისმიერი ხილი და ბოსტნეული დაამარინადოთ, თქვენი გემოვნებით.

დაგვჭირდება:

1 ლ თეთრი ღვინის ძმარი

1 ჭიქა წყალი

2 ჭიქა შაქარი

1 ს.კ. ზღვის მარილი

1-2 დარიჩინის ჩხირი

5-6 ცალი მიხაკი

2-3 კგ კომში

ყველა ინგრედიენტი ერთად მოვათავსოთ ემალირებულ ქვაბში, წამოვადუღოთ და ვხარშოთ 3-5 წუთი.

კომში კარგად გავრეცხოთ და დავჭრათ სასურველ ნაჭრებად. მჭიდროდ ჩავალაგოთ გასტერილებულ ქილებში, დავასხათ მდუღარე მარინადი ისე, რომ ქილები ბოლომდე შეივსოს და მოვხუფოთ. გადმოვაყირავოთ ქილები და ამ მდგომარეობაში გავაგრილოთ.

გემრიელად მიირთვით!