ბრინჯის ფლავი გოგრით, კომშით, ალუბლის ჩირით და პეკანით

დღეს გადავწყვიტეთ მოვამზადოთ ტკბილი ფლავი, თან გოგრა და კომში დავუმატოთ. ძალიან საინტერესო და ლამაზი კერძი გამოგვივა. რაც მთავარია, მარტივი და გემრიელი!

დაგვჭირდება:

300 გ ბრინჯი

3 კომში

500 გ გოგრა

50 გ ალუბლის ჩირი

100 გ კარაქი

50 გ პეკანი (ან ნიგოზი)

მარილი

სურვილისამებრ, ვანილი, დარიჩინი ან სხვა სანელებელი, თქვენი გემოვნებით

გოგრას გავაცალოთ კანი და დავჭრათ მომცრო კუბებად. კომშის ამოვაცალოთ გული და ასევე დავჭრათ კუბებად.

სქელძირიან ქვაბში გავალღვოთ 50 გ კარაქი, შემდეგ დავალაგოთ გოგრა და კომში და მოვაყაროთ კარგად გარეცხილი ბრინჯის ნახევარი. ზევიდან მოვაყაროთ დარჩენილი კომში და ალუბლის ჩირი და დავფაროთ დარჩენილი ბრინჯით. დანარჩენი კარაქი დავჭრათ პატარა ნაჭრებად და ჩავდოთ აქა-იქ ბრინჯში. ზევიდან დავასხათ 500-600 მლ მდუღარე წყალი, მოვაყაროთ ცოტაოდენი მარილი, დავაფაროთ თავსახური და შევდოთ 190 გრადუსამდე გახურებულ ღუმელში დაახლოებით 1 საათით.

პეკანი ოდნავ მოვხალოთ და მოვაყაროთ ზევიდან გამზადებულ ბრინჯის ფლავს.

გემრიელად მიირთვით!