ჩიზქეიქი ნიუ-იორკერი

იდეალური, ნაზი ნაღების ნამცხვარი, რომელიც პირში დნება- სწორედ ასეთია საკულტო ჩიზქეიქ-ნიუ -იორკერი. ამ ნამცხვარზე უარს ვერავინ იტყვის. ამიტომ ვიქენდისთვისაც სწორედ ას არაჩვეულებრივი ნამცხვარი შევარჩიეთ.

ძირისთვის დაგვჭირდება:

3 კვერცხი

6 ს.კ. შაქარი

ვანილი

2 ს.კ. ფქვილი

1 ჩ.კ. სახამებელი

100 მლ ლიქიორი ბეილისი, ამარეტო ან სხვა, თქვენი გემოვნებით

2 ფილა (180გ) თეთრი შოკოლადი

70 მლ 33% ნაღები

50 გ ნუშის ფანტელი (სურვილისამებრ)

შიგთავსისთვის:

750 გ კრემჩიზი ფილადელფია

5 კვერცხი

1 კვერცხის გული

1,5 ჭიქა შაქარი

250 გ 33% ნაღები

ნახევარი ლიმონის წვენი

2 შეკვრა ვანილი

ძირისთვის კვერცხი და შაქარი კარგად ავთქვიფოთ, შემდეგ დავუმატოთ ვანილი, მოვათავსოთ ორთქლზე და ვთქვიფოთ, სანამ მასა არ გაორმაგდება. ამის შემდეგ დავუმატოთ ფქვილი და სახამებელი და ფრთხილად მოვურიოთ.

საცხობ ფორმაში ჩავაფინოთ ქაღალდი და გადავასხათ ცომი. გამოვაცხოთ 180 გრადუსამდე გახურებულ ღუმელშიდაახლოებით 20 წუთის განმავლობაში.

გაგრილებული ბისკვიტი დავნამოთ ლიქიორით.

კრემჩიზი, შაქარი, კვერცხი და კვერცხის გული შევურიოთ ერთმანეთს მიქსერით, დაბალ სიჩქარეზე. დავუმატოთ ვანილი, ლიმონის წვენი და ნაღები. შემდეგ გადავასხათ ეს მასა ფორმაში, რომელშიც ბისკვიტი გვაქვს და გამოვაცხოთ 160 გრადუსამდე გახურებულ ღუმელში, ორთქლში (ჩიზქეიქის ფორმას ვდებთ სხვა, უფრო მოზრდილ ფორმაში, რომელშიც ვასხამთ მდუღარე წყალს) დაახლოებით 1,5 საათი.

გამომცხვარი ჩიზქეიქი ღუმელშივე გავაგრილოთ.

დაბალ ცეცხლზე შოკოლადი და ნაღები გავალღვოთ და დავფაროთ ამ მასით ჩიზქეიქი. მოვაყაროთ ნუშის ფანტელი და შევდოთ მაცივარში მინიმუმ 6 საათით.

გემრიელად მიირთვით!